تاند ( دوشنبه، د جوزا ۱۰مه) په کابل کې د چین سفیر د بهرنیو چارو وزارت له سیاسي مرستیال میرویس ناب  سره په لیدنه کې ویلي، چې له افغانستان سره به د سړک جوړولو او اقتصادي پراختیا په برخه کې مرسته کوي.

په دې لیدنه کې چین دغه راز د سولې په برخه کې هم د بشپړې همکارۍ ډاډ ورکړی دی.

چینایي لوري ویلي دوی د دې غوښتونکي دي، چې په افغانستان کې روان تاوتریخوالی پای ته ورسېږي او دایمي اوربند رامنځ ته شي.

سرچینې زیاته کړې، چې چین به له افغانستان سره د سړک جوړولو د ماشین الاتو مرسته کوي او تر څنګ به یې د کورونا وبا د مخنیوي په برخه کې هم خپلو همکاریو ته ادامه ورکوي.

د چین سفیر دغه راز ویلي،چې له افغانستان سره مرسته شوي واکسین به د اداري کارونو تر بشپړېدو وروسته ډېر ژر کابل ته را ورسېږي.

چین داسې مهال افغانستان سره د سړک جوړونې برخه کې د مرستې ډاډ ورکوي، چې په دې وروستیو کې د جګړو له امله له مرکزه د هېواد ګڼو ولایتونو ته تللې لارې په بمونو الوزول شوي او وېجاړې شوې دي.

د ننګرهار والي: طالبانو په سره رود ولسوالۍ کې یو پُل په بمونو الوزولی