تاند ( یک شنبه، د جوزا ۹مه) د کاپیسا ولایت په تګاب ولسوالۍ کې د واده پر مراسمو د هاوان مرمۍ لګیدلې، چې له امله یې شپږ ملکي کسان وژل شوي دي.
د یاد ولایت د والي ویاند شایق شورش وایي، پېښه تېر مازیګر ناوخته رامنځته شوه.
شورش زیاتوي، لومړی د وسله والو طالبانو او ولسي پاڅون کوونکو ترمنځ نښته رامنځ ته شوه، چې له امله یې د هاوان یوه مرمۍ په یوه کور،چې د واده مراسم پکې روان وو ولګېدله.
د نوموړي په خبره په دې پېښه کې د ماشومانو په ګډون ۶ کسان وژل شوي او ۱۰ نور ټپیان شوي دي.
د والي ویاند شایق شورش وایي ، دا مرمۍ د طالبانو له خوا توغول شوې، خو طالبانو تر اوسه په دې اړه رسنیو ته څه نه دي ویلي.
د یادونې ده، چې په دې وروستیو کې د هېواد په ګڼو ولایتونو کې جګړې زور اخیستی، چې په کې ډېره مرګ ژوبله ملکیانو ته اوړي.
عام خلک بیا د جګړې پر ښکېلو لورو غږ کوي، چې سوله وکړي او په خپلمنځي جګړو کې دې د عامو خلکو له وژنو لاس واخلي.