تاند (یکشبنه د ثور ۲۶) د غزني د ځينو سیمو اوسېدونکي وایي چې په خپلو سیمو کې نه حکومت او نه طالبانو ته د فعالیت اجازه ورکوي.
د غزني د مرکز اړوند آرزو کلي سلګونه اوسېدونکو په دغه سیمه کې د وروستیو نا امنیو او نښتو په غبرګون کې لاریون کړی او وايي چې د حکومت او طالبانو ترمنځ وروستیو جګړو سخت زیانمن کړي او ددوی ژوند یې تریخ کړی دی.
د دوی په خبره چې له همدې امله نه طالبانو او نه هم حکومت ته اجازه ورکوي چې له دې وروسته ددوی په سیمو کې فعالیت وکړي او نظامي تاسیسات جوړ کړي.
دا اعتراض وروسته له هغه کېږی چې تر اختر مخکې د طالبانو او حکومت ترمنځ په دغه سیمه کې د سختو نښتو راپورونه ورکړل شول.
غزنی یو له هغو ولایتونو دی چې په وروستیو کې د طالبانو او افغان ځواکونو ترمنځ د سختو نښتو شاهد دی چې یو شمېر اوسېدونکي یې د جګړو له امله سخت زیانمن شوي دي.