تاند ( دوشنبه، د ثور ۲۰ ) راپورونه وایي، تمه کیږي چې د سعودي عربستان حکومت به د حج په مراسمو کې بهرنیو وګړو ته د ګډون لپاره زمینه برابره کړي.
سعودي رسنیو ویلي چې د دغه هېواد حکومت پرېکړه کړې چې د کورونا په دې سختو شرایطو کې د بهرنیو هېوادونو وګړو ته د حج په مراسمو کې د ګډون زمینه برابره کړي.
سرچېنې وایي، د کورونا وبا له کبله به سږ کال د حج مراسم ترسره شي خو زیاتوي چې دغه مراسم به په ځانګړو شرایطو کې ترسره کېږي.
د معلوماتو له مخې، سعودي چارواکو ویلي چې دغه شرایط به وروسته اعلان کړي.
دا په داسې حال کې ده چې تېر کال د کورونا وبا د خپرېدو له امله د حج مراسم په خورا محدودیت کې یوازې د سعودي عربستان د کم شمېر وګړو له ګډون ترسره شول.
خو دا چې په راتلونکو مراسمو کې به خلکو ته په کومو شرایطو د ګډون اجازه ورکول کېږي سعودي عربستان یې وروسته په اړه د معلوماتو ورکولو خبره کړې ده.
تر دې وړاندې داسې راپورونه ورکړل شوي و چې ښایي سعودي سږ کال هم د کورونا وبا د شدت له کبله بهرنیو وګړو ته د حج ورکولو اجازه ورنه کړي.
سعودي عربستان تېر کال هم د کورونا وایرس د خپرېدو په خاطر بهرنیو زیارت کوونکو ته د حج د مراسمو اجازه ورنه کړه.
حج د سعودي عربستان د عایدو یوه مهمه سرچینه ګڼل کېږي او له همدې کبله دا هیواد غواړي چې سږ کال بهرنیو زیارتوالو ته د حج ادا کولو اجازه ورکړي؛ خو په وروستیو کې د کورونا وبا نوې څپې د سعودي عربستان په شمول د سیمې ګڼ هیوادونه سخت اندېښمن کړي دي.
د معلوماتو له مخې، د کورونا وبا تر خپرېدو مخکې هر کال سعودي عربستان ته د کال دوه نیم ملیونه زیارتوال د حج لپاره تلل چې له دې درکه سعودي د کال ۱۲ ملیارد ډالره ګټه کوله.
د حج د عوایدو پر کمېدو سربېره په نړۍ کې د تېلو د بیې ټیټېدو هم د سعودي عربستان پر اقتصاد ناوړه اغېز کړی دی.