تاند (پنجشنبه د حمل ۲۶) د امریکا د بهرنیو چارو وزیر انتوني بلینکن وايي، دوی پرېکړه کړې ده چې خپل ځواکونه له افغانستان څخه وباسي خو په خبره یې دا په دې مانا نه ده چې د ځواکونو له وتلو سره به د دواړو هېوادونو اړیکې ختمې شي.
بلینکن له ولسمشر غني سره په خبرو کې ویلي، د سرتېرو تر وتلو وروسته به د اړیکو نوی باب پرانیستل کېږي او په بېلو برخو کې به د دواړو هېوادونو ترمنځ اړیکې دوام پیدا کوي.
د ارګ له لوري په خپره شوې خبرپاڼه کې راغلي، چې ولسمشر غني نن پنجشنبه کابل ته د امریکا د بهرنیو چارو له وزیر انتوني بلینکن او ورسره پلاوي سره لیده کاته کړي.
د خبرپاڼې له مخې دغه لیدنه چې په ګلخانې ماڼۍ کې ترسره شوه، ولسمشر غني له ترهګرۍ سره پر مبارزه ټینګار وکړ او زیاته یې کړه چې د امریکایي ځواکونو د ایستلو په اړه د امریکا پرېکړې ته درناوی کوي.
د یادونې ده چې بلینکن نن په یو ناڅاپي سفر کابل ته رارسېدلی او ټاکل شوې چې د ولسمشر غني سربېره به له یو شمېر افغان چارواکو سره لیده کاته وکړي.
دغه راز نوموړی به د ورځې په پای کې یوې خبري ناستې ته د بهرنیو ځواکونو د وتلو او په افغانستان کې د سولې په اړه د وروستیو پرمختګونو په هکله وینا وکړي.
دا په داسې حال کې ده چې د امریکا ولسمشر جو بایډن په خپله تازه اعلان کړې پرېکړه کې ویلي چې د سپټمبر تر یوولسمې به له افغانستان څخه خپل ټول سرتېري وباسي او په دغه هېواد کې به خپله اوږده جګړه نوره پای ته ورسوي.