تاند ( دوشنبه، د حمل ۲۲) امریکا د افغانستان په اړه د ناټو له غړو هېوادونو سره مشوره کوي
راپورونو وایي، امریکا د افغانستان د وضعیت او راتلونکو اقداماتو په اړه د ناټو له غړو هېوادونو سره خبرې کوي.
د راپورونو له مخې د امریکا د بهرنیو چارو وزیر انتوني بلینکن په روانه اونۍ کې بروکسل ته ځي او د مهمو مسایلو په اړه د ناټو له غړو هېوادونو سره خبرې کوي.
د سرچینې د معلوماتو له مخې، له نوموړي سره به د امریکا ددفاع وزیر هم په دې سفر کې ملتیا کوي او تر ډېره به د افغانستان پر روان وضعیت، سولې او راتلونکو اقداماتو خبرې کېږي.
ددې تر څنګ ټاکل شوې چې بلینکن د ناټو له غړو هېوادونو سره د ایران او اوکراین په اړه هم خبرې وکړي.
بلینکن داسې مهال بروکسل ته ځي چې د ناټو غړي هېوادونه په دوو غونډو کې د افغانستان په اړه په پرېکړه کولو نه دي بریالي شوي او ټاکل شوې چې په راتلونکو غونډو کې دلته د سرتېرو د حضور یا وتلو په اړه یوې پرېکړې ته د رسېدو کوښښ وشي.
دا په داسې حال کې ده چې تېره ورځ د ولسمشر غني لومړي مرستیال امرالله صالح روانه اوونۍ د ترکیې د غونډې د پیل خبر ورکړ.
د ترکیې غونډه چې د افغانستان د برخلیک ټاکوونکي ګڼل کیږي د افغان حکومت تر څنګ پکې طالب استازي هم ګډون کوي.