تاند(دوشنبه، د حمل ۹) د افغانستان د بشر حقونو خپلواک کمېسیون وايي، په ترکیه کې د افغان سولې په تړاو جوړېدونکې ناسته کې د ښځو رول مهم دی، باید چې پراخه ونډه ورکړل شي.
د دې کمېسیون مشرې شهزاده اکبر رسنیو ته ویلي، چې په داسې ناستو کې د ښځو رول د سولې پر روانه پروسه مثبت اغېز کوي او ګټوره پایله لري.
اغلې اکبر زیاته کړې: “د دوحې په بحثونو کې څلور ښځې شاملې وې چې د قناعت وړ نه دي. متاسفانه موږ په مسکو کې شاته پاتې شو او د ښځو شمېر را کم شو، یوازې یوه ښځه پکې وه…”
بلخوا د هېواد ځینې ښځینه مدني فعالانې هم په استانبول کې د افغان سولې په تړاو جوړېدونکې ناسته کې د ښځو پر زیاتې ونډې ټینګار کوي او په وینا یې افغان ښځو ته په داسې ناستو کې بلنه ورکول د روان کړکېچ په له منځه وړلو کې مرسته کوي.
دا څرګندونې داسې مهال کېږي، چې د مارچ په ۱۸مه په مسکو کې لویه ناسته ترسره شوه، چې د ښځو په استازیتوب یوازې حبیبه سرابي ور بلل شوې وه.
ټاکل شوې ده چې دا ځل به ترکیه په اپرېل میاشت کې د افغان سولې په تړاو د یوې سترې ناستې کوربهتوب کوي.