تاند ( شنبه، د حمل ۷) د ننګرهار ولایت په چپرهار ولسوالۍ کې په ترافیکي پېښه کې ۱۴کسانو ته مرګ ژوبله اوښتې ده.
دا پېښه تېر مازیګر ناوخته په شغل درې سیمه کې د درېیو موټرو د ټکر له امله رامنځته شوې ده.
چارواکي وایې د دې ترافيکي پېښې له امله دوه ميرمنې او يو ماشوم مړه شوي او ۱۱تنه نور ټپيان شوي دي.
د دوی په خبره ټپيان روغتون ته ليږدول شوي او د ټولو وضعيت د ډاډ وړ دی.
دا ترافيکي پېښه د کاسټر او سراچه ډوله موټرو او اشټرينګي ريکشا ترمنځ شوې ده.
مسوولان د ټکر لامل د موټر چلوونکو بې احتیاطي ښيي چې له امله یې یاده مرګ ژوبله اوښتې ده.