تاند (سه شنبه د حوت ۲۶) ولسمشرۍ ماڼۍ په کابل، هرات او بغلان ولایتونو کې د وروستیو ماین چاودنو پړه پر طالبانو اچولې ده.
د ارګ په یوه خبرپاڼه کې راغلي، ترهګرو د خپلو جنایتونو په دوام د درېیو جلا جلا تروریستي بریدونو په پایله کې یو شمېر هېوادوالو ته مرګ ژوبله واړوله.
په خبرپاڼه کې د ولسمشر غني له قوله راغلي، د ملکي خدماتو او عامه تاسیساتو پر کارکوونکو، ساتونکو او استادانو چې د هیواد د اولادونو په روزنه او تحصیل بوخت دي، برید د اسلامي او بشري ارزښتونو خلاف جنایت دی اوهیڅ توجیه نه لري.
ښاغلي غني زیاته کړې، د طالبانو له لوري د وروستیو تاوتریخوالیو زیاتوالی ښیي چې دا ډله نه یوازې د اوسني ناورین د سوله ییز او اساسي حل اراده نه لري، بلکې د وضعیت له پېچلي کولو سره د سولې برابر شوی فرصت ګډوډوي.
ولسمشر غني دا څرګندونې وروسته له دې کړي چې نن سهار په بغلان کې د پوهنتون د استادانو په موټر برید کې اتو تنو ته مرګ ژوبله واوښته.
د راپورونو له مخې، دغه پېښه نن سهار هغه مهال شوې چې د بغلان پوهنتون د کرنې پوهنځي یو شمېر استادان د حملې په موټر کې د دندې پر لور روان وو، چې دوه تنه په کې ووژل شول او شپږ نور ټپیان شول.
دغه راز تېره شپه په هرات کې د پاشدان بند په ساتونکو وسله وال برید شوی چې درې امنیتي ځواکونه په کې وژل شوي او یو بل ټپي دی.
خو د هرات ځايي چارواکو د بریدګرو د وژل کېدو خبر ورکړی دی.
تېره ورځ بیا په کابل کې یوې چاودنې د یوې درې کلنې ماشومې او د هغې د مور په ګډون څلور کسان ووژل او ۱۶ نور یې ټپیان کړل.
دغه چاودنه پرون مازدیګر مهال د پوهنې وزارت، مخابراتو وزارت او اطلاعاتو او فرهنګ وزارت د ملکي کارکوونکو پر یوه ګډ کاسټر ډوله موټر شوې ده.