تاند ( شنبه، د  حوت ۲۳) په زابل ولایت کې پر یوه کور د هاوان مرمۍ لګېدو له امله شپږو کسانو ته مرګ ژوبله اوښتې.

مسوولان وایي چې د هاوان دا مرمۍ تېره ورځ د زابل مرکز اړوند نورک سیمه کې پر یوه کور لګېدلې.

د یاد ولایت د ولایتي روغتون مسوولان وايي، په یاده پېښه کې درې کوچنۍ نجونې وژل شوي او درې نورې ټپیانې دي.

د سیمې اوسېدونکي وايي د هاوان مرمۍ د حکومتي ځواکونو له لوري توغول شوې او دوی به یې په غبرګون کې د کندهار ـ کابل لویه لاره د اعتراض په توګه وتړي.

خو بل لورته بیا پولیسو ویلي، د یادې پېښې په اړه پلټنې کوي.

عام خلک بیا د جګړې له ښکېلو لوریو غوښتنه کوي چې په جګړه کې دې د ملکیانو ژوند خوندیتوب ته پام وکړي.

دوی وایي ډېری وخت په جګړه کې عام خلک په یوه او بله بهانه وژل کېږي او حکومت یې پوښتنه نه کوي.