تاند(شنبه، د حوت ۱۶) کاناډايي رسنۍ وايي، د دغه هیواد یو پوځي په افغانستان کې مړ وموندل شو.
د کاناډا دفاع وزارت د جمعې په ورځ (فبروري ۵) وویل چې دغه پوځي یې، چې (ګی اډم لا) نومېده، په کابل کې د کاناډا په سفارت کې په خپل هستوګنځي کې مړ موندل شوی دی.
د کاناډا د دفاع وزارت په بیان کې راغلي چې د دغه پوځي د مړینې د علت په اړه څېړنې روانې دي خو څه چې په ډاګه دي دا دي چې په پوځي عملیاتو کې نه دی وژل شوی.
لا، چې اصلاً د کاناډا د ساکاټون د سیمې اوسېدونکی و، د تېر کال له اګست څخه په کابل کې د کاناډا په سفارت کې د ساتونکي په توګه کار کاوه.
دی په ۱۹۹۱ کې د کاناډا له پوځ سره یوځای شو او تراوسه پورې څلور ځلې بهرنیو ماموریتونو ته استول شوی و.
د کاناډا دفاع وزارت وايي چې د (لا) مړی به سبا (د مارچ ۷) خپل هیواد ته ولېږدول شي.
د ۲۰۲۰ د فبرورۍ په ۲۱ د امریکا او طالبانو د موافقې له لاسلیکه وروسته په افغانستان کې بهرني پوځیان نه دي وژل شوي له همدې کبله د دغه کاناډايي پوځي مړینې ته ځانګړی پام اوښتی دی.
طالبانو ژمنه کړې چې پر بهرنیو پوځیانو به برید نه کوي.