تاند ( پنج شنبه، د حوت ۱۴) د افغانستان کرکټ ملي لوبډلې لوبغاړى وايي: «په هره لوبه کې چې د لوبې د غوره لوبغاړي جایزه واخلم، هغه به د خپل هېواد بې وزلو ته ځانګړې کړم.»
محمد نبي تېره ورځ د پاکستان سوپر ليګ کې ډېر ښه وځلېده او چټکه پنځوسيزه يې ووهله.
هغه په یاده لوبه کې د کراچۍ کنګز لوبډله بريا ته ورسوله او د لوبې غوره لوبغاړی شو.
نبي له تېرو څو کلونو راهيسې د محمد نبي خېريه بنسټ په نوم يو خېريه بنسټ هم چلوي چې د کابل په ګډون په ډېرو ولايتونو کې د بې وزله هېوادوالو سره مرستې کوي.
د یادونې ده چې نبي اوسمهال د نړيوالو شل اوريزو لوبو درجه بندۍ کې غوره الراونډر هم دی.
نوموړی د نړۍ په مشهورو لیګونو کې لوبېدلی او ښه ځلېدلی هم دی.