تاند ( چهارشنبه، د حوت ۱۳) د افغانستان په کوربتوب د دوه ټېسټ او درې شل اوریزو سیالیو د لوبلړۍ په لومړۍ ټېسټ لوبه کې افغانستان ستره ماتې وخوړه.
دا لوبه چې د مارچ په دوهمه نېټه پيل شوه په کې افغان لوبډلې په لومړۍ پاڼۍ کې د ټولو لوبغاړو په سوځېدو ۱۳۱ منډې جوړې کړې چې په کې افسر ځاځي ۳۷ او ابراهیم ځدراڼ ۳۱ تر نورو ډېرې منډې وکړې.
د زمبابوې لپاره بیا چټکو توپ اچوونکو مزرباني څلور او نیچي درې لوبغاړي وسوځول.
په مقابل کې زمبابوی په لومړۍ پاڼۍ کې د لوبډلمشر ویلیمس د سلیزې او د چکبوا د ۴۴ منډو پر مټ د ټولو لوبغاړو په سوځېدو ۲۵۰ منډې جوړې کړې.
افغانستان لپاره د اوږده ځنډ ورورسته لوبډلې ته راستون شوي حمزه هوتک شپږ او ظاهر خان ۲ لوبغاړي وسوځول.
په دوهمه پاڼۍ کې افغان لوبډلې یوځل بیا د تېر په څېر خپل لوبغاړي په پرلپسې توګه له لاسه ورکړل او د ابراهیم ځدراڼ د ۷۶ منډو پر مټ يې د ټولو لوبغاړو په سوځېدو ۱۳۵ منډې جوړې کړې او زمبابوی ته يې د ۱۶ منډو کوچنی هدف ورکړ.
د زمبابوی لپاره نيچي او تریپانو درې درې خو مزرباني بیا دوه لوبغاړي وسوځول.
زمبابوی د ۱۶ منډو هدف په ډېرې اسانۍ سره پوره او په دوهمه ورځ يې لوبه په لسو وېکټو په خپل نوم کړه.
دواړو لوبډلو ترمنځ به دوهمه ټېسټ لوبه د همدې مارچ میاشتې په ۱۱مه نېټه په همدې ابوظبۍ لوبغالي کې ترسره شي.