تاند ( پنج شنبه، د حوت ۷) د اطلاعاتو او کلتور وزارت د پښتو ژبې مشهور سندرغاړي استاد ګلزمان ته د پښتو موسيقۍ د (بابا) لقب ورکړ.
یاد وزارت دغه راز صفدر توکلي ته د دمبورې د (سلطان) لقب ورکړ.
د یاد وزارت سرپرست وزير محمد طاهر زهير د دې وزارت په انګړ کې په یوه جوړه شوې غونډه کې وویلې چې له هرې ممکنه لارې به هڅه وکړي چې د هېواد د هنرمندانو ملاتړ وکړي.
ښاغلي طاهر زهير زياته کړه: «هنرمندان د خلکو لپاره خوښي رامنځته کوي، د اطلاعاتو او کلتور وزارت پروګرام دا دى چې په هر ډول چې وي د هنرمندانو لاسنيوى وکړي او د هغوى د هنري فعاليتونو ملاتړ وکړي».
نوموړي وويل، په اوسنيو شرايطو کې يوازې هنرمندان دي چې د خپل هنر له لارې د خلکو له زړونو غمونه لرې کوي.
استاد ګلزمان ته د پښتو موسيقۍ د بابا او صفدر توکلي ته د دمبورې د سلطان لقبونو ورکولو تر څنګ يو شمېر هنرمندانو ته د استادۍ لقب سندونه او ستاينليکونه هم ورکړل شو.