تاند ( چهرشنبه، د کب ۶) رپوټونه وایي، د نړۍ تر ټولو لوی قاچاقبر الچاپو مېرمن هم د نشه یې توکو د قاچاق په تور نیول شوې ده.
د رپوټونو په حواله، ۳۱ کلنه اېما الېسپورو واشنګټن ته نږدې د ډولس هوایي ډګر کې نیول شوې ده.
د معلوماتو له مخې، نوموړې د جواکوین ګوزمن مېرمن ده چې په اصل کې د مکسیکو دی؛ خو د “الچاپو” په نامه په ټوله نړۍ کې مشهور دی.
د سرچینې د معلوماتو له مخې، د الچاپو پر مېرمن ایما تور دی چې کوکین، میتامفیتامین، هیروین او چرس یې خرڅول.
دا په داسې حال کې ده چې د هغې مېړه “الچاپو” دا مهال د نشه یې توکو او پیسو د قاچاق په جرم د نیویارک په یوه زندان کې د عمري بند سزا تېروي.
د نشه یې توکو قاچاق نه یواځې په افغانستان؛ بلکې د نړۍ په نورو سترو ښارونو کې رواج لري چې تر ډېره یې قاچاقبران د پولیسو له لوري نیول کیږي او بیا په بند محکومیږي.