تاند ( یک شنبه، د حوت ۳) د کرنې، اوبولګولو او مالدارۍ وزارت مسوولان وایي چې د کرنې د ودې او کلیوالي پراختیا پروژې « CBARD» له لارې په تېرو درېو کلونو کې د بادغیس په ولایت کې ۱۶۷۷جریبه نوي بڼونه جوړې شوي دي.
سرچینه زیاتوي چې په یاد شمېر بڼوڼو کې د پستې، مڼې، انګورو او چهارمغزو بڼونه شامل دي.
دکرنې وزارت وایي یاد بڼوڼه د یاد ولایت په جوند، غورماچ، قادس او بالامرغاب ولسوالیو کې جوړې شوي دي.
د سرچینې په خبره په یادو بڼوڼو په ټوله کې ۳۵ میلیونه ۵۶۷ زره او ۵۵۱ افغانۍ لګښت راغلی.
سرچینه وايي چې دوی په پام کې لري څو د کرنې د ودې او کلیوالي پراختیا پروژې له لاري، په ۱۴۰۰ ام کال کې د بادغیس په څلورو ولسوالیو کې د ۱۲۴ زره امریکایي ډالرو په ارزښت ۷۵۰ جریبه نوي بڼونه هم جوړ کړي.
دا په داسې حال کې ده چې په دې وروستیو کې په ټول هېواد کې بڼوالۍ ته د خلکو لېوالتیا ډېره شوې خو دوی له حکومت نه غواړي چې د حاصلاتو د پلور پرمهال له دوی سره مرسته وکړي.
ډېری بڼوال د حاصلاتو د پلور پرمهال شکایت کوي چې دمناسب بازار نشتون له امله یې مالونه خرابېږي او دوی ته زیان رسېږي.