تاند ( شنبه، د دلوې ۲۵) د اوبو د تنظیم ملي اداره وایي چې، ښايي کابو ۳۵ ورځې وروسته د شاه او عروس د اوبو په بند کې د اوبو زېرمه کول پيل شي.
د یادې ادارې مسوولانو که څه هم احتمالا دا خبره وکړه خو د تېرې سه شنبې په ورځ یې ویلي وو چې په کابل کې د شاه او عروس بند چارې په چټکۍ سره روانې دي او ۹۸ سلنه چارې یې بشپړې شوې دي.
د اوبو د تنظیم د ملي ادارې د معلوماتو له مخې دغه بند د موسمي سیلابونو، اوبو لګولو، بريښنا تولید او د کابل ښار اوسېدونکو ته د څکلو لپاره د پاکو اوبو برابرولو په موخه د کابل ولایت په شکر درې ولسوالۍ کې جوړیږي.
سرچینه زیاتوي چې د شاه او عروس بند د څه کم ۵۳ میلیونه امریکايي ډالر په لګښت جوړيږي او دا لګښت د افغان دولت د ملي بودیجې څخه ورکول کیږي.
د اوبو د چارو د تنظیم ملي ادارې د معلوماتو پر بنسټ د اوبو د زېرمه کولو دغه بند د ۹،۳ میلیون متر مکعب اوبو د ذخیره کولو وړتیا لري او کولی شي چې یو نیم میګاواټه برېښنا هم تولید کړي.
سرچینه داسې مهال په دې بند کې د اوبو د زېرمه کولو خبر ورکوي چې تېره اونۍ د افغانستان په جنوبي ولایت نیمروز کې هم د کمال خان بند د اوبه زېرمه کولو لړۍ پیل شوه.
له بل لوري مسوولان وایي د افغانستان شمال کې د بدخشان ولایت د شورابک بند د جوړېدو چارې هم ۹۵ سلنه بشپړې شوي دي.