تاند ( سې شنبه، د دلوې ۲۱) د افغانستان د کورنیو چارو وزارت وایي، په تېره یوه میاشت افغان ملي پولیسو د کابل ښار اړوندو سیمو کې ۳۰ حلقې ماینونه کشف او شنډ کړي دي.
د دغه وزارت ویاند طارق ارین وايي، د یادو ماینونو په شنډېدو سره د ۳۰ چاودنو مخنیوی شوی دی.
ښاغلی ارین دغه راز زیاتوي چې وسلوالو طالبانو اوس د جګړو په ډګر کې ماتې خوړلې؛ ځکه یې په کابل او نورو ښارونو کې د مقناطیسي چاودنو په ګډون د نا امنیو پر زیاتوالي ډېر تمرکز کړی دی.
د نوموړي په خبره امنیتي ځواکونو هم د ښار د امنیت د ټینګښت د هڅو په ترڅ کې په دې وروستو کې د نا امنیو د پېښو په تړاو د طالبانو په ګډون شاوخوا ۳۰۰ ترهګر نیولي او په لسګونه ماینونه او نورې چاودېدونکې وسیلې یې شنډ کړي دي.
د کورنیو چارو وزارت دا څرګندونې داسې مهال دي چې پرون دوشنبه هم کابل د د درې مقناطیسي ماین چاودنو شاهد و.