تاند (شنبه، د دلوې ۱۸) ارګ په یوه خبرپاڼه کې ویلي چې ولسمشرغني د امریکا د دفاع له وزیر لوید استین سره ټلیفوني خبرې کړې دي.
خبرپاڼه زیاتوي چې په دې ټلیفوني خبرو کې د دواړو هيوادونو ترمنځ د اړيکو او د افغانستان د سولې پروسې د وروستيو پرمختګونو په اړه بحث او خبرې وشوې.
سرچینه وایي، د امريکا دفاع وزير د دې ترڅنګ چې د افغانستان د امنيتي او دفاعي ځواکونو قربانۍ یې ستایلي ویلي، د هيواد نوی حکومت يې د سولې هغې پایداره پروسې چې د افغانانو په ګټه وي او په پايله کې يې دايمي اوربند ترلاسه شي ملاتړ کوي.
دواړو خواو همدا راز په دې ټېنګار کړی چې د سولې له دغه فرصت څخه ګټه واخیستل شي.
افغان ولسمشر داسې مهال د امریکا له دفاع وزیر سره پر افغان سوله خبرې کوي چې اوسمهال په دوحه کې د سولې خبرې په ټپه ولاړې دي.
تازه د طالبانو د سیاسي دفتر یو پلاوی چې مشري یې ملا برادر کوي، د ترکمنستان په رسمي بلنه دې هیواد ته تللی دی.
د طالبانو د قطر دفتر ویاند ډاکټر محمد نعیم وردګ په یوه ټوېټ پيغام کې لیکلي چې دغه پلاوی تېر ماښام ترکمنستان ته رسېدلی دی.
هغه لیکلي: «په دغه سفر کې به د افغانستان او ترکمنستان ترمنځ مسائلو، تجارتي اړیکو، سیاسي پرمختګونو او نورو اړوندو موضوعاتو بحث او د نظر تبادله وشي. »
تر دې وړاندې د طالبانو یو پلاوي مسکو ته او له هغې مخکې ایران ته هم سفرونه کړي چې له هغه ځایه یې د افغان حکومت ضد څرګندونو د خلکو غبرګونونه را پارولي دي.
د یادونې ده چې په دوحه کې د افغان دولت مرکچي پلاوی هم پر طالبانو نیوکه کوي چې د سولې دویم پړاو خبرو رسمي بحث ته نه حاضریږي او په سفرونو یې پیل کړی دی.
دغه راز د افغانستان د ملي مصالحې عالي شورا مشر ډاکټر عبدالله عبدالله هم تېره ورځ وویل چې طالبان د خبرو په ځای سفرونو ته مخه کړې او د مذاکرو رسمي بحث ته نه حاضریږي.