تاند (سه شنبه، د دلوې ۱۴) د افغان پوځ لوی درستیز محمد یاسین ضیا د کندهار د امنیتي وضعیت ارزونې په موخه دغه ولایت ته سفر کړی.
د ۲۰۵ اتل قول اردو څخه په خپره شوې خبرپاڼه کې راغلي چې ښاغلي ضیاء د کندهار له یو شمېر نظامي چارواکو سره ددې ولایت په عمومي وضعیت خبرې کړي دي.
د سرچینې د معلوماتو له مخې، په دغه لیدنه کې د کندهار امنیتي چارواکو له یاسین ضیاء سره نوي امنیتي پلانونه شریک کړل.
په خبرپاڼه کې دغه راز راغلي چې ښاغلي ضیاء ټینګار وکړ څو امنیتي ځواکونه د خلکو د امنیت د ټینګښت په موخه خپلې هڅې چټکې کړي.
سرچینه زیاتوي، دفاعي او امنيتي ځواکونو په وروستیو عملیاتو کې د کندهار ولایت په یو شمېر ولسوالیو کې “دښمن” ته درانه تلفات اړولي او د هغوی له شتون څخه يې زیاتې سیمي پاکې کړي دي.
یاسین ضیاء داسې مهال کندهار ته سفر کړی چې په دې وروستیو کې د پلازمېنې کابل په ګډون په ډېری ولایتونو کې تاوتریخوالی او ناامنۍ زیاتې شوي دي.