تاند (سه شنبه د دلوې ۷) ولسمشر اشرف غني د مایکروسافټ شرکت او ملینډا ګېټس بنسټ مشر بېل ګېټس سره خبرې کړي دي.
د افغانستان ولسمشرۍ ماڼۍ نن سه شنبه د یوې خبرپاڼې په خپرولو سره ویلي چې ولسمشر غني او بېل ګېټېس د دوشنبې په ماښام د وېډیو کنفرانس له لارې د پولیو یا ګوزڼ ناروغۍ سره د مبارزې په هکله خبرې وکړې.
د خبرپاڼې د معلوماتو له مخې، دواړو لوریو اندېښه څرګنده کړه چې تېر میلادي کال په افغانستان کې د ګوزڼ د مثبتو پېښو شمېر څو براره زیات شوی، ځکه چې طالبانو تر خپل واک لاندې سیمو کې د پولیو واکسین کارکوونکو ته د فعالیت اجازه نه ورکوله.
سرچینه زیاتوي، په دې مجازي ناسته کې د پولیو واکسین د تطبیق په بهیر کې د اصلاحاتو په راوستو او د امکاناتو پر زیاتوالي هم هر اړخیز بحث وشو.
د عامې روغتیا وزارت د معلوماتو له مخې، تېر ۲۰۲۰ میلادي کال په افغانستان کې د پولیو ۵۶ مثبتې پېښې ثبت شوي دي.
د طالبانو تر واک لاندې سیمو ته د پولیو واکسین نه رسول او د کورونا ویروس خپرېدل هغه څه دي چې افغان چارواکي یې د ګوزن د مثبتو پېښو د زیاتوالي لاملونه یادوي.