تاند (سه شنبه د دلوې ۷) د اروزګان ولايت په مرکز ترينکوټ ښار کې د دوو چاودنو له امله څلور کسان وژل شوي او اته نور ټپيان دي.
د راپورونو له مخې، لومړۍ چاودنه د موټر سایکل بم له امله رامنځته شوې او دويمه يې په هماغه ځاى کې د ځاى پر ځاى شوي ماين د چاودنې له امله شوې ده چې دوه پوليس او دوه ملکي وګړي په کې وژل شوي، يو پوليس او ۷ ملکيان ټپيان شوي دي.
د ولایتي روغتون مشر امین الله توخي بیا وايي چې هغوى ته د پېښې له ځایه يو جسد او اته ټپیان ور وړل شوي چې دوه يې پوليس دي.
دا پېښه نن سه شنبه ماښام شاوخوا اته بجې د دې ولایت په مرکز ترینکوټ ښار د منار څلور لاري د ملي پوستې سره نږدې شوې ده، چې نوعیت یې لا معلوم نه دی.
د ارزګان امنیتي چارواکو لا په دې اړه څه نه دي ویلي.
د دغه پېښې مسولیت تراوسه کومې وسله والې ډلې نه دی منلی.