تاند (دوشنبه د جدي۲۹) د هرات ولایت په انجیل ولسوالي کې ۴ تنه، چې د انسان تښتونکو له لوري تښتول شوي وو، نن غرمه د افغان ځواکونو د عملیاتو په ترڅ کې راخلاص او په تور یې ۱۲ تنه نیول شوي دي.
د هرات د والي ویاند جیلاني فرهاد تاند ته وویل: ” نن غرمه د انجیل ولسوالي اړوند د امام شش نور په سیمه کې د افغان ځواکونو د یو لړ چاڼیزو عملیاتو په ترڅ کې څلور تنه د انسان تښتونکو له منګلو راخلاص او د انسان تښتونکو یوه ۱۲ کسیزه ډله ونیول شوه. “
د نوموړي په خبره، چې دغه کسان له شاوخوا ۱۵ او ۲۵ ورځو راهیسې د هرات ښار له بیلابیلو سیمو څخه تښتول شوي وو.
لا مالومه نه ده، چې یاد کسان په کوم هدف نامالوم لوري ته وړل شوي و، خو د والي ویاند وایي، چې له نیولو شوو کسانو څخه یې پوښتنې پیل کړي دي.
یاد کسان په داسې مهال د تښتونکو له منګولو راخوشې کیږي، چې له دریو میاشتو وروسته هم په بلخ کې د عبدالرووف په نوم نهه کلن ماشوم د انسان تښتونکو په چنک کې پروت دی.
ولسمشر محمد اشرف غني، د تیرې شنبې په ماښام د بلخ ولایت چارواکو ته خبرداری ورکړی، که عبدالرووف یې پیدا او ونه ژغوره له دندو به یې ګوښه کړي، خو د ولسمشر لومړي مرستیال امرالله صالح بیا ویلي، چې په راتلونکو ۱۴ ورځو کې به یاد ماشوم پیدا او خپلې کورنۍ ته وسپاري.