تاند (شنبه د جدي ۲۷) ولسمشر اشرف غني د بلخ ټولو امنیتي چارواکو ته خبرداری ورکړی که چېرې په دغه ولایت کې اختطاف شوی ماشوم ازاد نه شي، نو د بلخ ولایت ټول امنیتي چارواکي به له دندو ګوښه کړي.
دغه موضوع د ولسمشر مرستیال ویاند دواخان مینه پال شنبه د شپې ۹:۰۷ بجې پر خپل ټوېټر مطرح کړې ده.
نوموړي د ولسمشر له قوله ویلي: «که بلخ کې اختطاف سوی ماشوم ازاد نه سي، د بلخ ټول امنیتي چارواکي له دندو لیري کوم.»
نژدې درې میاشتې وړاندې د عبدالرووف په نوم یو ماشوم په مزارشریف ښار کې هغه مهال د انسان تښتوونکو له خوا وتښتول شو چې ښوونځي ته په لاره و.
بلخوا د بلخ امنیه قومندانۍ ویلي چې د یاد ماشوم د خوشې کېدو په خاطر یې څو ځلې عملیات کړي، خو بې پایلې پای ته رسېدلي دي.
د ملي امنیت ادارې او د بلخ د پولیسو په وینا چې پینځه تنه یې د دغه ماشوم د برمته کولو په تور نیولي دي.