تاند (جمعه د جدي ۱۹) د ترکمنستان د بهرنیو چارو وزیر رشید مردوف کابل په دوه ورځني سفر نن جمعه کابل ته راغلی دی.
دافغانستان د بهرنیو چارو وزارت له لوري په خپره شوې خبرپاڼه کې راغلي، ټاکل شوې چې نوموړی له ولسمشر اشرف غني، د بهرنیو چارو له وزیر حنیف اتمر او د ملي امنيت شورا له سلاکار حمدالله محب سره وګوري.
د خبرپاڼې د مالوماتو له مخې مردوف به له افغان چارواکو سره د ترکمنستان او افغانستان ترمنځ د څو اقتصادي پروژو پرانستلو پر چمتووالي خبرې وکړي.
د افغانستان د بهرنیو چارو مرستیال وزیر میرویس ناب په کابل هوايي ډګر کې د رشید مردوف هرکلی کړی دی.
د بهرنیو چارو وزارت د مالوماتو له مخې افغانستان ته د ترکمنستان د بهرنیو چارو وزیر د راتګ اصلي موخه د دواړو هېوادونو تر منځ د امنیتي، سیاسي، نفت او ګازو په ګډون د یو شمېر مهمو مسایلو په اړه د تړونونو لاسلیک کول بلل شوي دي.