تاند(سې شنبه، د جدي ۲) د امریکا د دفاع سرپرست وزیر کریسټوفر میلر په نااعلان شوي سفر نن کابل ته راغی چې له افغانستانه د امریکايي پوځیانو تر وتلو مخکې له افغان چارواکو سره وویني.
پنتاګون وویل، میلر د افغانستان له ولسمشر اشرف غني او په افغانستان کې د امریکايي پوځیانو له عمومي قوماندان جنرال سکاټ میلر سره وکتل.
کابل ته د کریسټوفر میلر دا سفر په یوه اوونۍ کې افغانستان ته د دوهم امریکايي چارواکي سفر دی.
د تېرې چهارشنبې په ورځ د امریکا لوی درستیز مارک میلي په کابل کې له افغان چارواکو سره د طالبانو د زیاتېدونکو حملو په اړه خبرې وکړې.
کریسټوفر میلر د ولسمشر ټرمپ له لوري ګومارل شوی چې له افغانستانه د امریکايي پوځیانو د وتلو بهیر تروسه وسه چټک کړي.
میلر یو له هغو کسانو څخه دی چې له افغانستانه د امریکايي پوځیانو د ژر وتلو کلک پلوی دی.
ډونالډ ټرمپ میلر ته دنده سپارلې چې د جنورۍ تر نیمايي پورې په افغانستان کې د امریکايي پوځیانو شمېر ۲۵۰۰ ته راکم کړي.
امریکايي رسنۍ وايي چې اوس په افغانستان کې د دغه هیواد د پوځیانو شمېر شاوخوا ۴ زره دی.
د امریکا او طالبانو د فبرورۍ د ۲۹ نېټې د موافقې پر اساس امریکايي پوځیان باید د ۲۰۲۱ تر مې میاشتې له افغانستانه ووځي.