تاند (یکشنبه د قوس ۳۰) په ولسي جرګه کې د کابل د خلکو د استازي خان محمد وردک په موټرو چاودنه شوې ده.
نن یکشنبه سهار شاوخوا لس نیمې بجې د کابل ښار د پینځمې امنیتي حوزې اړوند په خوشال خان سیمه کې د ولسي جرګې د غړي خان محمد وردک په موټرو چاودنه وشوه.
د کورنیو چارو وزارت وزارت وايي چې په دې چاودنه کې اته تنه وژل شوي او د ولسي جرګې د غړي خان محمد وردک په ګډون ۱۵ تنه نور ټپیان دي.
ددې وزارت د ویاند طارق ارین په خبره، په ټپیانو کې ښځې، ماشومان او د ډېر عمر لرونکي کسان هم شامل دي.
د نوموړي په خبره د پېښې په نژدې سیمه کې کورونو او ودانیو ته درانه مالي زیانونه اوښتي دي.
تر دې وړاندې ځيني امنیتي سرچینو رسنیو ته په خبرو کې ویلي و چې په دې چاودنه کې ۹ کسان وژل شوي او شپږ نور ټپیان دي.
تر اوسه کوم چا یا ډلې ددې برید مسؤلیت نه منلی.