تاند ( جمعه، دقوس ۲۸) دکندهار ـ هرات پر لویه لار د ترافيکي پېښې له امله ۱۵ تنو مسافرینوته مرګ
ژوبله اوښتې ده.
مسوولان وایي دا پېښه په ادرسکن ولسوالۍ کې نن سهار رامنځته شوې ده.
د ادرسکن ولسوال عبدالعلي فقیریار وایي په دې پېښه کې ۵ مسافر مړه شوي او ۱۰ نور ژوبل شوي دي.
فقیریار وايي چې په مړو کې دوه ښځې او په ټپیانو کې ماشومان هم شامل دي.
نوموړی وایي ټپيان روغتون ته د ښې درملنې لپاره لېږدول شوي او په خبره يې دځینو ټپيانو روغتیايي حالت د اندېښنې وړ دی.
خو بل لورته د هرات د عامې روغتیا ریاست ویاند رفیق شېرزی وایي په دې پېښه کې ۵ تنه مړه شوي او ۲۰ نور ټپيان شوي دي.
شېرزی وایي په ټپيانو کې ۳ ماشومان،۶ مېرمنې او ۱۱ نارینه شامل دي.
دا يواځېنۍ پېښه نه ده چې پر دې لاره رامنځته کېږي بلکې د هېواد د مرکز او ولایتونو ترمنځ په تړلو لویو لارو کې وخت ناوخته دا ډول پېښې له خلکو ژوند اخلي.
عام خلک د ترافيکې پېښو د زیاتوالي لامل د موټر چلوونکو د بې احتیاطۍ ترڅنګ د لارو خرابوالی یادوي.