تاند(سې شنبه، د قوس۲۵) د پرتګال چارواکي وايي، په دغه هیواد کې یوه افغان پناه غوښتونکي یو بل پناه غوښتونکی د مذهبي عقایدو په خاطر وژلی دی.
پرتګالي رسنۍ وايي چې دا پېښه په پلازمېنه لیسبون کې شوې او وژل شوی کس هینري اونیکاچي (Henry Onyekachi) نومېږي.
پرتګالي رسنیو تراوسه پورې د قاتل نوم او عکس نه دی خپور کړی ځکه چې محکمې تراوسه پورې د هغه په اړه پرېکړه نه ده کړې.
(عکس د مقتول دی)نایجریا
اونیکاچي ۲۹ کلن و او څو میاشتې پخوا یې له نایجریا څخه پرتګال ته پناه وړې وه. دی له یوه افغان پناه غوښتونکی سره په یوه خونه کې اوسېده.
د لیسبون د پولیسو په وینا دا پېښه د دسمبر په اتمه شوې. د پېښې په مهال Henry Onyekachi له شاوخوا خلکو د مرستې غوښتنه کړې وه خو هیچا یې ږغ ته ځواب نه و ویلی تر دې چې هغه د وینو د ضایع کولو په نتیجه کې ومړ.
پرتګالي رسنۍ وايي چې دواړو مذهبي تبلیغ کاوه او د اپارتمان پر نورو اوسېدونکو یې اغېز درلود.
د Henry Onyekachi د کورنۍ غړیو په نړۍ کې د بشري حقونو او د بیان د ازادۍ پر ملاتړو ږغ کړی چې د دوی د عزیز د وژل کېدو په اړه دې د عدالت د رعایت کېدو لپاره اقدام وشي.
د دوی له دې غوښتنې وروسته د وژل شوي کس په اړه خبرونه په نړیوالو رسنیو کې خپاره شول.