تاند ( یک شنبه، د قوس ۲) د استرالیا پوځ یو ځل بیا ویلي چې، په افغانستان کې یې د سرتېرو جنګي جنایتونه ټکان ورکوونکي دي.
د استرالیا د پوځ لوړپوړو چارواکو په یوه خبري غونډه کې ویلي دې مسئلې دوی اړ کړي څو؛ په پوځ کې پر مهمو او بنسټیزو جوړښتونو له سره کتنه وکړي.
د استرالیا پوځ تر دې وړاندې هم ویلي وو د دغه جنایتونو په اړه د اسنادو افشا کېدو دوی اړکړي چې په پوځ کې اساسي تغیرات راولي.
په دې وروستیو ورځو کې ګڼو نړیوالو بنسټونو دا غوښتنه کوله چې استراليا دې په افغانستان کې د خپلو سرتېرو جنګي جنایتونه وڅېړي.
لومړنیو څېړنو وښوده چې دغه پوځیانو شاوخوا څلوېښت ملکیان په قصدي توګه وژلي دي.
استرالیا له دې درکه بښنه غوښتې خو افغان حکومت د افغانانو د ساتونکي نظام په توګه په دې مسئله کې دومره فعال رول نه دی ادا کړی.
مدني فعالان او د بشري حقونو فعالین بیا پر حکومت غږ کوي چې استرالیا د قربانیانو کورنیو ته د درنو پورونو ورکولو ته اړکړي.