تاند ( چهارشنبه، د عقرب ۲۸) د عامې روغتيا د وزارت سرپرست احمد جواد عثماني نن یو خبري کنفرانس ته وویلې چې، د کورونا وبا د مثبتو پېښو ډېرېدو ته په پام ویلی شي چې هېواد د کرونا وبا له دوهمې څپې سره مخ دی.
عثماني د کورونا ویروس د دوهمې څپې د مخنیوي په موخه د عامې روغتیا وزارت له لوري د تدابیرو ډاډ ورکړی.
هغه زیاته کړې چې بېړنۍ کمېټې بیا ځلې فعالې شوي او د دې ویروس د دوهمې څپې راتګ پر وړاندې مبارزه کوي.
د عامې روغتيا سرپرست وزير دغه راز ویلي چې د کابینې د پرېکړې له مخې د دغه ویروس د دوهمې څپې خپرېدو مخنیوي په پار د ودونو هوټلونه چې په هېواد کې د ویروس د خپرېدو مهم عوامل دي د لېندۍ میاشتې ترپایه به وتړل شي.
هغه دغه راز پر هېوادوالو غږ کړی دی چې د کورونا ویروس مخنیوي لپاره دې روغتیایي سپارښتنو ته جدي پاملرنه وکړي.