تاند ( شنبه، د عقرب ۲۴) د هېواد له بیلا بیلو سیمو تر لاسه شوي خبرونه وايي چې، په سړو سیمو کې د واورو او په میداني سیمو کې بیا بارانونه پيل شوي دي.
د سالنګ تونل چې د هېواد شمالي ولایتونه له مرکز سره نښلوي د لویو بار وړونکو موټرونو پرمخ تړل شوی دی.
ځايي خلک وایي د پکتیا په تیرې کنډو کې هم واوره شوې او موټر چلوونکو ته د احتیاط سپارښتنه شوې ده.
د کابل په یو شمیر ولسوالیو لکه خاک جبار، پغمان او شکردرې په ځینو سیمو کې هم واوره وریدلې.
تېره ورځ د هوا پېژندنې ادارې مسوولانو ويلي وو چې، په راتلونکو ۲۴ ساعتونوبه کې د کابل په ګډون د هېواد بېلابېلو ولایتونو کې واوره او بارانونه پیل شي
سرچينې زیاته کړې وه چې په بېلابېلو برخو کې به د ورښت کچه د ۲۰ تر ۳۰ سانتي متره وي.
عام خلک هم د باران پيل ته هیله من دی.
دوی وایي هیله لري چې په دې سره به سږنی کال هم آباد او دوی کرنيزه برخه به لا ښه شي.