تاند(پنجشنبه، د عقرب۲۲) د افغانستان دفاع وزارت وايي، ځواکونو یې د ازبکستان د اسلامي غورځنګ د مشر زوی وژلی دی.
دفاع وزارت وايي، د اربکستاني «ترهګرو» د تحریک مشر طاهر یولداش زوی (عزیز بولداش) د فاریاب ولایت د غورماچ ولسوالي په حاجي سعیدګل کلي کې وژل شوی دی.
دفاع وزارت وايي چې په دې عملیاتو کې د عزیز یولداش زوی حکمت یولداش ټپي شوی دی.
د افغانستان دفاع وزارت وايي، عزیز یولداش د افغانستان د شمالي ولایتونو په ناامنیو کې د پام وړ برخه لرله.
که د عزیز یولداش وژل کېدا تایید شي دا په وروستیو څو اوونیو کې د افغان امنیتي ځواکونو له لوري د خپلو دښمنانو د ځپلو په برخه کې مهم انکشاف ګڼل کېدای شي.
تېره میاشت افغان امنیتي ځواکونو په غزني کې د القاعده شبکې دوهم درجه مشر ابومحسن المصري په یو لړ عملیاتو کې وواژه.
د نوموړي وژل کېدا د امریکا متحدو ایالتونو تایید کړه.
ولسمشر غني د افغان امنیتي ځواکونو له لوري د المصري د وژل کېدا په غبرګون کې وویل، ملي امنیتي ځواکونو د هند نیمې وچې لپاره د القاعده ډلې د مسوول ابومحسن المصري په وژلو سره ثابته کړه، چې د تروریزم ګواښ او له بهرنیو ترهګرو ډلو سره د طالبانو اړیکې لا هم پر خپل ځای دي.
د روانې اوونۍ د سې شنبې په ورځ د افغانستان د ملي امنیت ریاست وویل، ځانګړیو ځواکونو یې د فراه ولایت په بکوا ولسوالۍ کې د هند وچې لپاره د القاعده شبکې یو بل مهم مشر محمد حنیف وواژه.
https://taand.net/%d8%af-%d9%85%d9%84%d9%8a-%d8%a7%d9%85%d9%86%db%8c%d8%aa-%da%81%d9%88%d8%a7%da%a9%d9%88%d9%86%d9%88-%d9%be%d9%87-%d9%81%d8%b1%d8%a7%d9%87-%da%a9%db%90-%d8%af-%d8%a7%d9%84%d9%82%d8%a7%d8%b9%d8%af%db%90/
په وروستیو کې د جوزجان، سرپل او فاریاب ولایتونو چارواکو او عامو خلکو له رسنیو سره په خبرو کې ویلي و چې د ازبکستان د اسلامي تحریک د مشر طاهر یولداش زوی په دغو ولایتونو کې خلک له داعش سره یوځای کېدو ته وربولي.
د دوی په وینا په دغو درو ولایتونو کې شاوخوا ۳ زره تنه له داعش سره ملګري شوي او په دې کې د یولداش زوی ډېره ونډه لرلې ده.