تاند ( پنج شنبه، د عقرب ۱۵) ایران، روسیې او هند د افغانستان پر سوله درې اړخیز کنفرانس ترسره کړی دی.
د رسنيو د راپورونو له مخې دغه کنفرانس په مسکو کې جوړ شوی و او یادو هېوادونو په افغانستان کې پر روان تاوتریخوالي اندېښنه ښودلې ده.
د دغه کنفرانس ګډونوالو رسنیو ته ویلي چې: « د افغان حکومت او طالبانو ترمنځ مذاکرات بن بست ته رسېدلي، هېڅ راز پرمختګ نه لري، تاوتریخوالی ډېر شوی دی او دې مسئلې د سیمې امنیت ته خطرونه او ګواښونه متوجه کړي دي.»
دوی وایي چې، د کنفرانس ګډونوال پر دې غږېدلي چې څنګه وکړی شي د افغانستان د سولې په مسئله کې همکاري وکړي او دواړه لوري دې ته وهڅوي چې په خپلو دریځونو کې نرمښت راولي.
د یادونې ده چې د سیمې هېوادونو تر دې وړاندې هم په افغانستان کې پر روان وضعیت اندېښنه ښودلې او دلته یې د سولې له پروسې ملاتړ کړی دی.
دوی ټینګار کړی چې روانه جګړه باید ژر تر ژره د خبرو له لارې ختمه کړل شي او افغانان دې د مذاکراتو له لارې یوه تفاهم ته ورسېږي.