تاند (یکشنبه د عقرب ۴) څو ورځې وړاندې طالبانو د هلمند د مرکز لښکرګاه ښار په ګډون ددې ولایت په ډېرو برخو بریدونه وکړل، چې په پایله کې یې تر ۴۰ زره کسان بې سرپناه شول او د ملکي وګړو او امنیتي ځواکونو په ګډون پکې سلګونو طالب وسله والو ته مرګژوبله واوښته.
تازه د هلمند ځايي چارواکو په دې ولایت کې د اتلانو په نوم د یوې نوې نظامي قطعې د جوړېدلو خبر ورکړ.
دې نوې زر کسیزې نظامي قطعې ته به د ملي امنیت په چوکاټ کې زده کړې ورکول کېږي او په دندو کې به برخه واخلي.
د ځايي چارواکو په وینا ددې قطعې د جوړېدلو لپاره د هلمند له بیلابیلو سیمو څخه ځوانان جذب شوي دي، چې لومړی به نظامي زده کړې ورکول کېږي او بیا به په مهمو دندو کې برخه واخلي.
د هلمند والي جنرال محمد یاسین خان وايي، دا کسان ددغه ولایت له اراضۍ سره بلد دي چې د امنیتي وضعیت په ټینګښت کې به مثبت رول ولوبوي.
ښاغلي یاسین خان د اتلانو په نوم قطعې لپاره نوي جذب شوي کسان د هېواد ریښتیني اتلان یاد کړل او زیاته کړې یې ده همدوی به د «دښمن» د هر ډول ورانکاره کړنو مخنیوی کوي.
ویل کېږي تر دې وړاندې هم په هلمند کې د سنګوریانو په نوم یوه نظامي قطعه جوړه شوې وه، چې د دولت د مخالفینو په ځپلو کې یې مهم رول تر سره کړی دی.