تاند ( یک شنبه، د سنبلې ۳۰) د خیبرپښتونخوا په شمالي وزیرستان سيمه کې د وسله والو او امنیتي ځواکونو ترمنځ نښته کې دوه پاکستاني پوځیان وژل شوي دي.

پاکستاني پوځ په یوه خبرپاڼه کې د خپلو دوو پوځیانو وژل کېدل تایید کړي او ویلي یې دي، چې دا پېښه هغه مهال رامنځته شوه کله، چې امنیتي ځواکونو په یاده سیمه کې د استخباراتي معلوماتو پر بنسټ د لټون عملیات کول.

خبرپاڼه زیاتوي، چې د عملیاتو پر مهال نښته رامنځته شوې، چې له امله یې دوه پوځیان وژل شوي دي.

د خبرپاڼې له مخې، امنیتي ځواکونه د پېښې ځای ته رسېدلي او سیمه یې کلابنده کړې ده.

بل لورته تر اوسه د برید پړه کومې وسله والې ډلې پر غاړه نه ده اخیستې.

په دې وروستیو کې په شمالي وزيرستان کې د نا امنیو پېښې ډېرې شوي دي. څو ورځې وړاندې هم په ياده سيم کې ۷ پاکستاني پوځیانو ته مرګ ژوبله اوښتې وه.

https://taand.net/%d8%b4%d9%85%d8%a7%d9%84%d9%8a-%d9%88%d8%b2%d9%8a%d8%b1%d8%b3%d8%aa%d8%a7%d9%86-%da%a9%db%90-%db%b7-%d9%be%d8%a7%da%a9%d8%b3%d8%aa%d8%a7%d9%86%d9%8a-%d9%be%d9%88%da%81%d9%8a%d8%a7%d9%86%d9%88-%d8%aa/