تاند، سه شنبه د سنبلې ۲۵مه: د ننګرهار سیمه ییز چارواکي وايي نامعلومو وسله والو د پوهنتون استاد ادم خان ملاتړ وژلی دی.
د ننګرهار د والي ویاند عطاءالله خوګیاڼی وايي، پېښه نن سهار شاوخوا ۷:۰۰ بجې هغه مهال رامنځته شوې چې دغه استاد خپلې دندې ته روان وو.
د نوموړي په خبره یاده پېښه د ننګرهار د خوګیاڼو ولسوالۍ اړوند حکیم آباد سیمه کې رامنځته شوې ده.
ادم خان ملاتړ د ننګرهار پوهنتون د ژبو او ادبیاتو پوهنځي استاد وو، چې تر دې وړاندې یې بدخشان پوهنتون کې هم د استاد په حیث وظیفه تر سره کړې ده.
تر اوسه ددغې پېښې مسؤلیت کوم چا یا ډلې پر غاړه نه دی اخیستی.
د یادونې وړ ده چې په دې وروستیو کې هدفي وژنې او د سړک غاړې ماین چاودنې د هېواد په ټولو ولایتونو کې زیاتې شوي چې د چارواکو سربېره پکې عامه خلکو هم مرګ ژوبله اوړي.