د سولې خبرې؛ د تماس ډلې به نن کړنلار او کاري اصول عمومي غونډې ته وړاندې کړي

تاند (سې شنبه، د سنبلې ۲۵) ټاکل شوې ده چې په قطر کې د افغانستان د حکومت او طالبانو د مرکچي پلاوو د تماس ډلې نن (سې شنبه) د کړنلارې او کاري اصولو په اړه نورې خبرې وکړي او د موافقې په صورت کې یې د دواړو خواوو د پلاوو عمومي غونډې ته وړاندې کړي.

پرون د دواړو خواوو د تماس ډلو د کاري اصولو او طرزالعمل یا کړنلارې په اړه مفصلې خبرې وکړې او د عمومي غونډې لپاره یې تر ډېره حده چمتو کړه.

سره له دې چې د دواړو خواوو غړي وايي چې خبرې یې په ښه ډول او له ناندریو په لېرې فضا کې پرمخ ځي خو تر خپل مهالوېش یو څه شاته دي.

د چارو کتونکي وايي چې تر دې دمه د سولې خبرې مثبتې روانې دي او ښايي دلیل یې دا وي چې اصلي او حساس پړاو لا په وړاندې دی.

طالبانو پخوا په ځلونو ویلي چې که د بهرنیو پوځیانو د وتلو مهالوېش اعلان شو، له نورو افغانانو سره به په خبرو او یوې موافقې ته په رسېدو کې ستونزه ونه لري.

خو تر دې دمه طالبانو د اوربند په اړه د افغانستان د حکومت او نړیوالې ټولنې غوښتنه نه ده منلې او بلکې جګړې ته یې تر پخوا هم شدت ورکړی دی.

د طالبانو له لوري د جګړې شدت ډېر افغانان، چې د سولې خبرو ته هیله من شوي وو، یو څه اندېښمن کړي او په دې اړه یې نهیلي کړي چې د سولې روانه پروسه به بریالۍ شي.