تاند، چهارشنبه د سنبلې ۱۲مه: د کندز پولیس په دې ولایت کې د طالبانو لخوا د یوې ښځینه پولیسې افسرې د وژل کېدو خبر ورکوي.
د کندز د امنیه قومندانۍ ویاند هجرت اکبري وايي، دغه پېښه تېره ورځ ناوخته د کندز ښار په شوره خاک ساحه کې رامنځته شوې ده.
د ښاغلي هجرت په خبره د صالحې په نوم دې پولیسې افسرې ددغه ولایت په ګلتپې ولسوالۍ کې دنده تر سره کوله چې طالبانو تېره ورځ ناوخته وژلې ده.
مېرمن صالحې ۴۵ کاله عمر درلود او د پینځو اولادونو مور وه.
طالبانو تر اوسه په دې هکله څه نه دي ویلي.
د راپورونو له مخې تر دې وړاندې هم طالبانو څو ښځینه پولیسې د غزني په شمول په څو ولایتونو کې وژلې وې.