تاند ( یک شنبه، د سنبلې ۹) کابل ښاریان وایی، چې یوځل بیا په دې ولایت کې د عاشورا دمراسمو د امنیت ساتنې په خاطر عامو خلکو ته وسلې ویشل شوي دي.
ویل کیږي، چې دا وسلې د عاشورا مراسمو باندې د وسله والو بریدونو مخنیوي په موخه پر دوی حکومت ویشلي دي.
د کابل ښار په هر واټ او څلور لارو کې په وسلو سمبال شخصي جامو کې کسان ولاړ دي، چې د عاشورا مراسمو لپاره یې په خپله امنیت نیولی او چک پاینټونه یې جوړ کړي دي.
دوی وايي چې د هرې تکیه خانې لپاره د امنیتي ځواکونو پر ځای له ۱۰ تر ۱۵ پورې دغه وسله وال ګومارل شوي دي.
کابل ښاریان او د نظر خاوندان نیوکه کوي، چې د عاشورا مراسمو د امنیت لپاره د عامو خلکو وسله وال کول ناوړه عواقب لري.
د چارو شنونکي وایي، چې دا په غیر مستقیم ډول ملېشه سازۍ ته زمینه سازي ده او له دغو خلکو څخه بېرته د وسلو ټولول ستونزمن کار دی.
هرکال د عاشورا په رارسېدو د دې مراسمو د ټینګښت لپاره پر شخصي کسانو وسلې ویشل کیږي او عام خلک بیا نیوکه کوي چې له همدې امله په لویو مراسمو بریدونه هم کیږي.