تاند، چهارشنبه، د اسد ۲۹مه: د افغانستان د ملي دفاع وزارت وايي طالبانو له څو خواوو د غزني ښار د ارزوی کلان او ارزوی خرد سیمې په مربوطاتو کې د امنیتي ځواکونو پر پوستو بریدونه وکړل.

د ملي دفاع وزارت د معلوماتو په اساس په غزني ښار د طالبانو د برید په پایله کې د دغې ډلې ۳۰ کسان وژل شوي او برید یې په شاه تمبول شوی دی.

دفاع وزارت وايي په دې نښته کې د طالبانو ډلې اړوند یو لوی تونل چې دوی ترې د موضع او پټنځای په توګه ګټه پورته کوله هم د امنیتي ځواکونو لاسته ورغلی دی.

طالبانو تر اوسه په دې هکله څه نه دي ويلي.

د ملي دفاع وزارت تر اوسه امنیتي ځواکونو ته په دغه نښته کې د اوښتې مرګژوبلې په اړه معلومات نه دي ورکړي.

دا په داسې حال کې ده چې تېره ورځ هم د غزني ښار اړوند د ارزو په کلي کې د طالبانو او امنیتي ځواکونو تر منځ نښته کې ددغه ولایت د پولیسو د ځانګړې قطعې آمر له طالبانو سره په نښته کې ووژل شو.

https://taand.net/%d8%ba%d8%b2%d9%86%d9%8a-%da%a9%db%90-%d8%af-%d9%be%d9%88%d9%84%db%8c%d8%b3%d9%88-%d8%af-%da%81%d8%a7%d9%86%da%ab%da%93%d9%8a-%d9%82%d8%b7%d8%b9%db%90-%d8%a2%d9%85%d8%b1-%d9%84%d9%87-%d8%b7%d8%a7/