تاند ( یک شنبه، د اسد ۱۹) د پاکستان ځانګړي استازي محمد صادق د لویې جرګې له هغې پرېکړې، چې له مخې یې باید ۴۰۰ طالب بندیان خوشې شي هرکلی کړی دی.

نوموړي په خپل ټوېټر پاڼه لیکلي، چې د دې وړاندیز په پلي کیدو سره به د بین الافغاني خبرو په لاره کې یو لوی خنډ له منځه لاړ شي.

د ۴۰۰ طالب بندیانو د پرېکړې لپاره دایره شوې مشورتي لویه جرګه نن پای ته ورسېده او د جرګې ګډونوالو ولسمشرغني ته وړاندیز وکړ څو طالب بندیانو د خوشې کېدو فرمان لاسلیک کړي.

د مشورتي لویې جرګې د پای ته رسېدو په وینا کې ولسمشرغني وویلې، چې د لویې جرګې د پرېکړې پر بنسټ به د ۴۰۰ طالب بندیانو د خوشې کولو فرمان ژر لاسلیک کړي.

غني زیاته کړه، چې روانه جګړه یوازې د خبرو پر مټ پای ته رسېدی شي نو طالبانو ته په کار ده، چې د جرګې پرېکړې ته په درناوي اوربند وکړي.

https://taand.net/%d8%af-%d8%b3%d9%88%d9%84%db%90-%d9%85%d8%b4%d9%88%d8%b1%d8%aa%d9%8a-%d9%84%d9%88%db%8c%db%90-%d8%ac%d8%b1%da%ab%db%90-%d9%be%d9%87-%d8%a7%d8%ae%d8%aa%d8%aa%d8%a7%d9%85%db%8c%d9%87-%d8%ba%d9%88%d9%86/

هغه د خپلو خبرو په دوام یو ځل بیا پر طالبانو غږ وکړ، چې د سولې غږ ته لبیک ووايي او جګړه پای ته ورسوي.

نوموړي وویلې، چې لا هم ځینې مسایل په ابهام کې دي خوپه خبره یې افغان حکومت هڅه کوي څو د سولې په برخه کې هر ګام په پوره دقت پورته کړي.

پاکستان په سیاسي برخه کې د افغانستان یو له سرسخته سیالانو شمېرل کیږي، چې د عامو افغانانو په باور تل یې په افغانستان کې اور ته لمن وهلې او د جګړې ډګر يې تود ساتلی دی.

بل لورته د ملي امنیت پخواني مشر رحمت الله نبیل هم ویلي، چې په پاکستان هېڅ باور نه دی پکار.

https://taand.net/%d9%86%d8%a8%d9%8a%d9%84-%d9%be%d8%b1-%d9%be%d8%a7%da%a9%d8%b3%d8%aa%d8%a7%d9%86-%d8%a8%d8%a7%d9%88%d8%b1-%d9%be%d9%87-%da%a9%d8%a7%d8%b1-%d9%86%d9%87-%d8%af%db%8c/