افغانستان او هند سبا ورځ پایلوبه کې د اتلولۍ ګټلو په موخه لوبیږي
د افغانستان او هندوستان کرکټ معلولینو لوبډلو ترمېنځ دوه شل اوریزې سیالۍ ترسره شوې او ددې سیریز وروستۍ سیالۍ سبا غرمه نږدې ۱۰ بجې د هند په ممبۍ کې ترسره کیږي. دا سیالۍ به ددې سیریز پرېکړه کوونکې سیالۍ وي، ځکه پایلوبه ده او ګټل یې د دواړو لوبډلو لپاره خورا ارزښت لري.
هېره دې نه وي چې له دې وړاندې افغانستان او هندوستان د معلولینو کرکټ لوبډلو دوه سیالۍ وکړې چې تېره سیالۍ یې افغان لوبډلې په خپل نوم کړې وه او له دې وړاندې لومړۍ سیالۍ بیا د هند معلولینو کرکټ لوبډلې ګټلې وه.
د یادولو ده چې دغه دواړه لوبډلې به د هند په همدې ممبۍ ښار کې د روانې ډيسمبر میاشتې په ۱۵مه او ۱۷مه نېټه هم دوه یو ورځنۍ سیالۍ ترسره کړي.
