افغانستان په ۹۱ منډو سریلانکا ته ماتې ورکړه
تاند- افغانستان د کرکټ د اسیايي کپ په خپله لومړۍ سیالي له سریلانکا څخه په ۹۱ منډو وګټله.
افغانستان، چې سریلانکا ته یې ۲۵۰ منډې هدف ټاکلې وې، ننني بري د څلورو غوره لوبډلو پړاو ته ورساوه.
په باولینګ کې مجیب ځدراڼ دوه لوبغاړي وسوځول او د درېم په رن اوټ کولو کې یې هم اصلي رول ولوباوه.
محمد نبي د سریلانکا د مهم لوبغاړي انجیلو متیوس په ګډون ۲ لوبغاړي وسوځول. راشد خان ۲، ګلبدین نایب ۲ لوبغاړي وسوځول.
د افغانستان لوبډلې ته ۱۰۰۰۰ ډالره جایزه ورکړل شوه او د غوره لوبغاړي جایزه هم رحمت شاه ځدراڼ وګټله چې یو نیم زره ډالره وه.
ټاکل شوې ده چې سبا /سې شنبه/ هند او هانګ کانګ مخامخ شي. هانګ کانګ د یکشنبې په ورځ په ډېر توپیر پر پاکستان وبایلله او داغسې نه ښکاري چې بل پړاو ته د رسېدو چانس ولري.
د افغانستان بله مسابقه به د پنجشنبې په ورځ /سپټمبر ۲۰/ له بنګله دېش سره وي. که هرې لوبډلې دا سیالي وګټله د اې ګروپ له دوهم ټیم احتمالاً هند یا پاکستان سره به مخامخ کېږي. هند او پاکستان به د چهارشنبې په ورځ په خپل منځ کې معلومه کړي چې کومه لوبډله د لومړي ټیم په توګه څلورو سرخېلو لوبډلو ته وځي.
