د افغانستان د غوره لیګ نښان معرفي شو
تاند- د افغانستان د کرکټ د غوره لیګ یا پریمرلیګ نښان (لوګو) پرون /دوشنبه/ د متحده عربي اماراتو په دوبۍ کې معرفي شو.
د افغانستان په غوره لیګ کې، چې ۵ لوبډلې به پکې برخه لري، د نړۍ یو شمېر نامتو لوبغاړو د ګډون تیاري ښوولې ده.
د هغوی په ډله کې ګریس ګیل، شاهد افریدي، شعیب ملک، بریندن مکولم، مصباح الحق، کومار سنګاکارا او تمیم اقبال شامل دي.
لوبغاړي به د سپټمبر په لومړۍ اوونۍ په دوبۍ کې واخیستل شي.
تراوسه دوه ټیمونه اخیستل شوي دي.
د افغانستان د کرکټ ټیمونو ته د زونونو د نومونو پر ځای د ولایتونو نومونه ورکړل شوي؛ لکه کابل، کندهار، ننګرهار، پکتیا او بلخ)
ښايي ښه دا وای چې د سیمو تاریخي نومونه ورکړل شوي وای چې نه یوازې د یادو ولایتونو بلکې د هرې سیمې، چې څو ولایتونه پکې شامل دي، د اوسېدونکو لېوالتیا ورسره پیدا شوې وای.
د بلخ پر ځای باختر، د کابل پر ځای کابورا، د ننګرهار پر ځای ګندهارا، د کندهار پر ځای ارکوزیا، د پکتیا پر ځای پکتیس…
د نښان د معرفۍ په غونډه کې د افغانستان د کرکټ بورډ عمومي ريیس عاطف مشعل غوره لیګ د افغان لوبغاړو د ځلېدو او د کرکټ د ودې لپاره یو ښه فرصت وباله.
