د فوټبال د فدراسیون مشر د نجونو د لوبډلې پر جامو بخښنه وغوښته
تاند- د افغانستان د فوټبال فدراسیون د نجونو د فوټبال لوبډلې د جامو په خاطر بخښنه وغوښته.
د فوټبال د فدراسیون ريیس کرام الدین کرام بې له دې چې د اردن په وړاندې د افغان نجونو د فوټبال د مسابقې د خرابې نتیجې یادونه وکړي، ویلي چې د ټیم لوبغاړو غیر شرعي او د افغانستان د قوانینو خلاف یونیفورم اغوستی و.
د افغانستان د فوټبال د نجونو ملي ټیم دوی اوونۍ وړاندې په عمان (امان) کې د اردن له لوبډلې سره دوی مسابقې وکړې او دواړه یې وبایللې.
لومړۍ یې ۶ پر صفر او دوهمه ۵ پر صفر وبایلله.
خو کرام الدین کریم وروسته له دې د خپل ټیم د لوبغاړو د جامو پر څرنګوالي بخښنه وغوښته چې د افغان لوبغاړو عکسونه په ټولنیزو رسنیو کې خپاره شول او یو شمېر کسانو پرې نیوکې وکړې.
د فوټبال د فدراسیون مسوولان وايي چې د ملي لوبډلې یو شمېر لوبغاړي له اروپايي او امریکايی هیوادونو راغلي او هغوی په همداسې جامو کې له لوبو سره عادت شوي دي.
