درې نور افغان لوبغاړي د هند د غوره لیګ لپاره واخیستل شول
تاند- د هند د کرکټ د غوره لیګ لپاره د لوبغاړو په لیلام یا مزایدې کې نن /یکشنبه/ ۳ نور افغان لوبغاړي واخیستل شول.
راشد ارمان، محمد نبي، ظاهر خان او مجیب ځدراڼ هغه ۴ لوبغاړي دي چې سږ کال به د هند د کرکټ په راتلونکي غوره لیګ کې لوبېږي.
دوی بېلابېلو ټیمونو په متفاوتو بیو اخیستي دي.
مجیب ځدراڼ
د افغانستان د کرکټ تنکی لوبغاړی مجیب ځدراڼ د هند د غوره لیګ لپاره په ۴ کروړ روپیو واخیستل شو.
۱۶ کلن مجیب ځدراڼ، چې د افغانستان د نولس کلنو په لوبډله کې لوبېږي، سږ کال د لومړي ځل لپاره د آیرلنډ خلاف په ملي لوبډله کې ولوبېد.
ده د نولس کلنو په اسیايي جام کې د افغانستان په اتلولۍ کې مهمه ونډه لرله.
مجیب به د هند په پریمرلیګ کې له (کینګ ۱۱ پنجاب) سره یوځای شي.
محمد نبي
محمد نبي نن /یکشنبه/ یو وار بیا د حیدراباد د سین رایزر له لوري په ۱ کروړ روپیو واخیستل شو.
نبي تېر کال هم له راشد سره په همدې لوبډله کې و.
ظاهر خان
د ظاهر خان په اړه ویل کېږي چې لا سم نه دی پېژندل شوی او ممکن د هند په غوره لیګ کې هم ښه تجربه او هم ښه نوم ترلاسه کړي.
راشد ارمان
د افغانستان د کرکټ د ملي لوبډلې تکړه لوبغاړی راشد ارمان پرون /شنبه/ د هند د غوره لیګ یا پریمرلیګ د سیالیو لپاره په لیلام کې په ۹۰۰ لکه هندي روپیو واخیستل شو.
راشد ارمان بیا هم د حیدراباد سن رایزر لوبډلې واخیست. راشد ارمان تېر ځل هم له همدې لوبډلې سره لوبېدلی و.
د هند د کرکټ د غوره لیګ لپاره د لوبغاړو د اخیستلو بولۍ پرون سهار پیل شوې.
درو ټیمونو د راشد ارمان د خپلولو لېوالتیا لرله.
د ده لپاره لومړۍ بیه ۲۰۰ لکه هندي روپۍ اعلان شوې، تر دې چې ۹۰۰ له روپیو ته لوړه شوه.
د نولس کلنو لوبډله – له نیوزیلنډ سره د سیالۍ غوره شېبې
