د راشد ارمان په حضور کې د استرالیا مېشتو افغانانو لومړنی کلب پرانیستل شو
تاند- په استرالیا کې د افغانانو د کرکټ لومړنی کلب د افغانستان د ملي لوبډلې د تکړه لوبغاړي راشد ارمان په حضور کې پرانیستل شو.
راشد ارمان، چې د استرالیا په بیګ بش سیالیو کې د ګډون لپاره په دغه هیواد کې دی، نن /پنجشنبه/ مخکې تر دې چې سبا په بیګ بش کې لومړنۍ سیالي وکړي، له استرالیا مېشتو افغانانو سره د دوی د کرکټ کلب په پرانیستونکې غونډه کې ګډون وکړ.
دا لوبډله (پښتون کرکټ کلب او اکاډیمي) نومېږي.
په استرالیا کې د افغانانو د کرکټ کلب په جوړولو کې د پښتنو ټولنې مشر عذیر ساپي زیاتې هڅې کړي دي.
ښاغلی ساپی وايي، افغانانو هیله لرله چې د دغه کلب په پرانیستونکو مراسمو کې د افغانستان د ملي لوبډلې یو لوبغاړی حاضر وي، خو له ښه مرغه د راشد ارمان راتګ د دوی دا ارمان ورپوره کړ.
د استرالیا په بیګ بش سیالیو کې راشد ارمان او محمد نبي عیسي خېل په دوو جلا لوبډلو کې لوبېږي.
