استرالیايي لوبډله د راشد خان ارماني په ارمان کې ده
ښایي د شهزاد محمدي، محمد نبي عیسی خیل او حمید حسن په شتون کې د دې ډېر کم چانس وي چې د افغانستان کرکټ ملي لوبډلې ځوان ۱۷ کلن لیګ سپینر بالر راشد ارمان دې د اسټرالیا په سوداګریزو (بیګ باش) سیالیو کې ولوبیږي، خو خبره دغسي نه ده.
د اسټرالیا د فوکس سپورټ ویبپاڼې راپور ورکړی دی چې په افغان کرکټ ملي لوبډلې کې د (ګوګلي) بال ماسټر او لیګ سپینر راشد خان ارمان اوسمهال په اسټرالیا کې د یوې مخکښې لوبډلې پام ځان ته اړولی دی.
د راپور له مخې، د اسټرالیا په کوربتوب سوداګریزو (بیګ باش) شل اوریزه کرکټ سیالیو کې د جنوبي اسټرالیا د مخکښې (ایډلیډ سټرایکرز) لوبډلې د لوړو مهارتونو مسوول ټیم نیلسن په ذهن کې د راشد ارمان نوم ګرځي ترڅو یې د انګلستاني عادل رشید په ځای خپلې لوبډلې ته جذب کړي.
د نیلسن په وینا که عادل رشید د خپلي ملي لوبډلې سره د مصروفیت له کبله له دوی سره په (بیګ باش) سیالیو کې ونه لوبیږي، نو د افغانستان ځوان لوبغاړې راشد ارمان چې په شل اوریزه کرکټ نړیوال جام سیالیو کې یې بهترینه بالینګ وکړ د دوی له پاره غوره انتخاب دی.
ویل کیږي، چې ایډلیډ سټرایکرز لوبډله اوسمهال د یوه سپینر بالر په لټه کې ده، ترڅو د انګلستاني عادل رشید ځای ونیسي.
ښایي عادل رشید د روان کال په نومبر میاشت کې هندوستان ته د انګلستانۍ کرکټ ملي لوبډلې د سفر له کبله د روان کال په (بیګ باش) سیالیو کې د ایډلیډ سټرایکرز لوبډلې سره لوبې و نه کړای شي.
که څه هم ټیم نیلسن د راشد خان شینواري له بالینګ څخه ډیر متاثره شوې ده، خو په اسټرالیا کې به دا د ډیرو له پاره حیرانوونکی وي، چې د اسټرالیا په کورنیو سترو بیګ باش سیالیو کې د ایډلیډ سټرایکرز لوبډلې په ګټه په لوبه کې داسې لوبغاړی وویني، چې د نړیوال کرکټ ډيره کمه تجربه او نوم لري.
اسټرالوي روزونکي ټیم نیلسن بیا په دې کې زړه نا زړه دی، چې ایا په هندوستان کې کامیاب شوی بالر به د اسټرالیا په اب او هوا او پیچونو کې بریالې شي او کنه؟
د نوموړي په وینا، دهندوستان ویکټې د سپینرانو له پاره برابرې وي، خو د اسټرالیا هغه داسې نه دی، یقینا چې په نړیوال کرکټ کې د کمې تجربې لرونکي سپینر بالر ته به دا یو ستر چیلینج وي.
د یادونې وړ ده، چې راشد خان شینواري تېرکال د لومړي ځل له پاره د افغانستان کرکټ ملي لوبډلې له پاره ولوبېد، چې د هندوستان په کوربتوب ۲۰ اوریزه کرکټ نړیوال جام سیالیو کې په ۱۱ ویکټو دویم مخکښه بالر و.
نوموړی تراوسه د افغانستان له پاره په ۱۴ نړیوالو شل اوریزه لوبو کې لوبیدلی، چې ۱۴ ویکټې یې ترلاسه کړي او په دغو ټولو سیالیو کې افغانستان بریاوې ترلاسه کړي دي.
