افغان ۱۹ کلن له پاکستاني ۱۹ کلنو سره د اسیايی جام په پایلوبه کې
تاند- د افغانستان تر ۱۹ کلنو کشره لوبډله به سبا /یکشنبه/ د مالیزیا په پلازمېنه کولالمپور کې د پاکستان له نولس کلنو لوبډلې سره د نولس کلنو د اسیايی جام په پایلوبه کې مخامخ شي.
افغانستان په نیمه پایلوبه کې نیپال او پاکستان په نیمه پایلوبه کې بنګله دېش ته ماتې ورکړې ده.
په روان ټورنمنټ کې افغانستان د نوومبر په لسمه پاکستان ته سخته ماتې ورکړې وه.
په روانو سیالیو کې د افغان لوبغاړو بې سارې لوبه د افغانستان د کرکټ راتلونکې ته د افغانانو او نړیوالو هیله څو برابره زیاته کړې ده.
د افغانستان تر نولس کلونو د کشرو لوبغاړو لوبډله په ۲۰۱۱ او ۲۰۱۳ کپونو کې هم ښه ځلېدلې وه.
د افغانستان د نولس کلنو لوبغاړی مجیب الرحمن ځدراڼ پرون /جمعه/ نیپالي لوبغاړي ونه سوځول بلکې ورېبل. ده په داسې حال کې چې ۲۸ منډې ورکړې، ۶ تکړه نیپالي لوبغاړي وسوځول.
په روان تورنمنټ کې افغان لوبډلې یوه ماته، هغه هم د باران له کبله وخوړه. خو په خپل ګروپ کې د سر ټیم په توګه نیمه پایلوبې ته ووت.
په نیمه پایلوبه کې افغان نولس کلنو نیپال ته په ۷ ویکټونو او ۱۷۷ توپونو ماتې ورکړه چې خورا سخته ماتې ده. افغان لوبغاړو پاکستان ته هم تقریباً همداسې سخته ماتې ورکړې وه.
